തൃശൂര്‍>>> ചേറ്റുവയില്‍ 30 കോടി രൂപ വിലവരുന്ന തിമിംഗല വിസര്‍ജ്യം പിടികൂടി. ‘ഒഴുകുന്ന സ്വര്‍ണം’ എന്നറിയപ്പെടുന്ന 18 കിലോ ‘ആംബര്‍ ഗ്രീസ്’ ആണ് ചേറ്റുവയില്‍ പിടികൂടിയത്.
സംഭവുമായി ബന്ധപ്പെട്ട് മൂന്നു പേരെ വനംവകുപ്പ് അറസ്റ്റ് ചെയ്തു. വാടാനപ്പിള്ളി സ്വദേശി റഫീഖ്, എറണാകുളം സ്വദേശി ഹംസ, പാലയൂര്‍ സ്വദേശി ഫൈസല്‍ എന്നിവരാണ് പിടിയിലായത്. മീന്‍ പിടിക്കാന്‍ പോയവരില്‍ നിന്നാണ് ഇത് ലഭിച്ചതെന്നാണ് പ്രതികളുടെ മൊഴി.
അന്താരാഷ്ട്ര സുഗന്ധലേപന വിപണിയില്‍ ഇതിന് 30 കോടി രൂപ വിലവരുമെന്ന് വൈല്‍ഡ്‌ ലൈഫ് ക്രൈം കണ്‍ട്രോള്‍ ബ്യൂറോ ഉദ്യോഗസ്ഥര്‍ പറഞ്ഞു. ആംബര്‍ഗ്രിസ് കേരളത്തില്‍ നിന്നും പിടികൂടുന്നത് ആദ്യമായാണ്.
തിമിംഗിലങ്ങളുടെ ദഹനേന്ദ്രിയവ്യവസ്ഥയിലെ പിത്തസ്രവത്തില്‍ നിന്ന് മെഴുകുപോലെ രൂപപ്പെടുന്ന ഖരവസ്തുവാണ് ആംബര്‍ ഗ്രീസ്. കടലിലെ നിധി, ഒഴുകുന്ന സ്വര്‍ണം എന്നൊക്കെയാണ് സ്പേം തിമിംഗലങ്ങളുടെ ഛര്‍ദി അഥവാ ആംബര്‍ഗ്രിസ് അറിയപ്പെടുന്നത്.
സ്പേം തിമിംഗലത്തിന്‍റെ സ്രവമാണിത്. അത്യപൂര്‍വമായി മാത്രം ലഭിക്കുന്ന വസ്തുവാണിത്. തിമിംഗലങ്ങള്‍ ഇടയ്ക്ക് ഛര്‍ദിച്ചുകളയുന്ന ഈ വസ്തു, ജലനിരപ്പിലൂടെ ഒഴുകി നടക്കും. ഒമാന്‍ തീരം ആംബര്‍ഗ്രിസ് സാന്നിധ്യത്തിന് പേരുകേട്ടതാണ്. പ്രധാനമായും സുഗന്ധദ്രവ്യങ്ങള്‍ നിര്‍മിക്കാനാണ് ആംബര്‍ഗ്രിസ് ഉപയോഗിക്കുക. കടല്‍ത്തീരത്തെ മണലില്‍ ഇത് അടിഞ്ഞുകാണപ്പെടാറുണ്ട്.
